لبني يونس أسوأ عبارة مصر 🇪🇬

أسوأ عبارة مع لبني يونس مصر 🇪🇬

عارفين اسوء عبارة بتتقال ايه

عبارة او كلمة

ده تربية مرة

ودي تربية ست

أو ده تربية أمه بلاش تجوزه بنتك

أو ده بيت مفيهوش راجل ما تناسبش منه

- بجد هو ده ذنب الست اللي اترملت وقعدت علي عيالها وربتهم احسن تربية وشقيت وواجهة الحياة بكل قسوتها ....

ووسط مجتمع مابيرحمش ولا بيسيب حد في حالة

ومش هانقول بيساعد لا بالعكس بيحارب الست اللي لوحدها عشان يعجزها و يخليها تفشل ....

- ولا ذنب الست اللي اتجوزت راجل مش اد المسؤلية ومستهتر ومش بيتقي الله ومش بيشوف غير نفسه ومصلحته هو وبس ودول بقوا للاسف كتير اوووي

- ولا ذنب الست اللي جوزها مريض أو أصيب و معاق وربنا ابتلاه في صحته

- او الزمن فرض علي الست دي ( المرة ) زي ما بتقولوا،

تحت اي ظرف تشيل المسؤلية لوحدها وتجاهد بولادها لحد ماتوصلهم لبر الامان ،،،،،

تشتغل وتربي وتعلم وتأكل وتشرب وتعالج و تجوز وتشيل المسؤلية والهم ...ام واب ..

والاخر تلاقي شخص تافه أو ست عمرها ما شالت مسؤلية ، يسخروا منها ومن شقاها وتعبها علي أسرتها وعلي عيالها ،،،،،

عارف يعني ست شايلة هم مصاريف مدارس ودروس و ايجار احسن تنطرد هي وعيالها بره البيت ويترموا في الشارع وفلوس علاج لعيل مريض وكل شوية تروح بيه مستشفي ، و بنت بتتعلم وعايزة تتجهز ودخول مواسم و....و.... ومرازية الزملاء في شغلها اللي لازم تتحمل فيه كل السخافات وتحارب وتصمد عشان ده اكل عيشها هي واللي في رقبتها ،

وماينفعش تقع أو تنهار أو تمرض ولا حتي تشتكي أو تبان ضعيفة .